Ish-ministri Arben Ahmetaj është thirrur në SPAK, në kuadër të hetimeve që po bëhen ndaj këtij të fundit.
Ahmetaj po hetohet për 4 akuza, për shpërdorim detyre, korrupsion, pastrim parash dhe përfitime të paligjshme.
Ish-zëndëskryeministri shoqërohet nga avokati i tij, Henrik Ligori. Fakti që ka qenë i pranishëm edhe avokati i tij mbrojtës rrit dyshimet se ndoshta SPAK mund t’i komunikojë akuzën Arben Ahmetajt.
Arben Ahmetaj në pamje dukej i qetë dhe mbante në dorë një dosje. Ndaj tij janë dy procedime, të cilat janë bashkuar në një të vetme: një procedim lidhet me inceneratorët dhe procedimi tjetër vjen nga kallëzimi i bërë nga një gazetar.
Kjo është hera e parë që ish-zv.kryeministri paraqitet në SPAK për këto hetime.
Kujtojmë se Gjykata e Lartë rrëzoi ish-zv. kryeministrin Arben Ahmetaj i cili kishte bërë rekurs kundër vendimit për kontrollin e vilës në Hamallaj, në pronësi të bashkëjetueses së tij Erjola Hoxha. Organi i akuzës ka vendosur në sekuestro preventive dy vila, të cilat dyshohet se janë në pronësi të bashkëjetueses dhe ish-bashkëshortes së ish-zëvendëskryeministrit.
