Kryetari i Partisë Demokratike, Sali Berisha, akuzoi përfaqësuesit e Partisë Socialiste se përmes manipulimeve dhe terrorit ndaj qytetarët, rrëmbyen fitoren e kandidatit të opozitës në Rrogozhinë. Në një deklaratë për media, Berisha denoncoi me emër, përfaqësues dhe drejtorë të PS, që u përfshinë në manipulimin e zgjedhjeve të pjesshme në Rrogozhinë, duke u bërë thirrje qytetarëve për protesta.
Kryetari i Partisë Demokratike, Sali Berisha, i cilësoi zgjedhjet e përsëritura të Rrogozhinës, si një farsë elektorale, e njëjtë më atë të 14 majit. Në një dalje nga selia blu, lideri i opozitës, deklaroi se qytetarët dhe bizneset e Rrogozhinës kanë votuar në klimën e një terrori të vazhdueshëm nga mazhoranca dhe në zgjedhje u përdorën mekanizmat e vjedhjes së votës.
Berisha denoncoi me emra konkretë, përfaqësues të lartë të Partisë Socialiste, të cilët i akuzoi për akte antiligjore në fushatën e Rrogozhinës.
Berisha publikoi edhe disa nga pamjet, qe vërtetojnë shkeljet e procesit zgjedhor në Rrogozhinë, foto të votimit familjar dhe dëshmi të qytetarëve që u është bërë presion nga bashkia e drejtuar prej kandidatit të PS, Edison Memolla.
Lideri i selisë blu iu kundërpërgjigj edhe kryebashkiakut të Tiranës, Erion Veliajt, i cili si drejtues politik i qarkut reagoi në përfundim të numërimit të votave në Rrogozhinë.
Duke renditur të gjitha skandalet e socialistëve në 40 ditët e fundit dhe faktet për manipulimin e zgjedhjeve, Berisha u bëri thirrje qytetarëve për protesta.
