Zëri i Amerikës
Megjithatë kryeministri Edi Rama këmbëngul se përgjegjësia është individuale: “100 herë të kthehesha mbrapa, 100 herë do të mbështesja këto partneritetet publike – private që kemi bërë, 100 herë, sepse veprat janë ato që mbeten. E rëndësishme është që për shembull, sterilizimi është një nga kontratat dhe një nga punët më të bukura që ne kemi bërë,sepse me atë kontratë dhe me atë transformim ne kemi ndryshuar shëndetësinë shqiptare në hallkën e vetë më delikate që janë ndërhyrjet në trupin e njerëzve. Nëse në procesin e asaj kontrate individë të caktuar kanë hyrë në gjynah me popullin dhe me atdheun të cilit ne i shërbejmë, do paguajnë. Kështu funksionon. Do paguajnë”.
Kryeministri i trajtoi si një çështje thjesht teknike, dyshimet për ndërhyrje nga brenda, në sistemin TIMS, të policisë: “Hetimi i brendshëm është kryer i plotë dhe nuk ka asnjë shqetësim. Ajo ngjarja e rëndë nuk ka ndodhur se s’ka pasur as mundësi të ndodhi sepse në përpjekje për të bërë backup-in ka dalë që s’ka backup fare. Kështu që, është një problem teknik i brendshëm. Ata kanë punën e tyre dhe në atë punë ata janë të monitoruar. Edhe hetimi është bërë kështu që nuk ekziston kjo”.
Përkundër deklaratave të kryeminisrit, Agjencia e Mbikqyrjes Policore rezulton të ketë bërë denoncim në Prokurorinë e Tiranës, për ndërhyrje të paautorizuar, ndërsa vetë ambasada amerikane, e cila bëri publik faktin, u ofrua pak ditë më parë që të ndihmonte hetimet.
Zoti Rama foli dhe për çështjen e nxehtë mes Shqipërisë dhe Greqisë për rastin e kryebashkiakut të zgjedhur të Himarës Fredi Beleri, arrestimi i të cilit, dy ditë përpara zgjedhjeve vendore të 14 majit, konsiderohet nga Athina si i motivuar politikisht, duke kërkuar lirimin e tij. Zoti Rama e bëri të qartë se nuk mund të pranojë asnjë ndërhyrje ndaj sistemit të Drejtësisë: “Asnjë lloj interference, ngado që të vijë mbi sistemin e drejtësisë, nuk do të gjejë, jo përkrahjen, por nuk do të gjejë as mirëkuptimin tonë. Ne nuk ndërhyjmë në çështjet e sistemit të drejtësisë. Ne nuk i komentojmë vendimet e organeve të reja të drejtësisë”.
Raportet mes dy vendeve janë tejet të tensionuara, aq sa kryeministri grek, në fillim të kësaj jave, shmangu haptazi një ftesë për zotin Rama në një darkë informale në Athinë me udhëheqësit e vendeve të rajonit të Ballkanit.