Bashkëkryesuesit e Grupit për Çështjet Shqiptare në Senatin e SHBA, dy senatorët Joni Ernst dhe Gary Peters i janë drejtuar Sekretarit të Shtetit të SHBA, Antony Blinken, për Luginën e Preshevës dhe kauzën e drejtë të shqiptarëve etnikë atje.
Kështu ka njoftuar anëtar i bordit të Ligës Qytetare Shqiptaro-Amerikane Faton Bislimi, në faqen e tij të Facebook.
Ai ka paraqitur këtë letër me nënshkrimet e dy senatorëve.
Në letrën e tyre, senatorët i kërkojnë Sekretarit të Shtetit që të hapë temën e çështjes shqiptare në Luginë në secilin komunikim apo takim me autoritetet serbe.
“Letra potencon faktet tanimë të vërtetuara ndërkombëtarisht – qoftë përmes Raporteve të vet Departamentit të Shtetit apo edhe Rezolutës së Parlamentit Evropian të Majit 2023 — për diskriminimin shtetëror ndaj shqiptarëve në Luginë, me theks të veçantë, pasivizimin e adresave si metodë administrative e spastrimit etnik”, shkruan Bislimi.
Në letër kërkohet realizimi i Planit Shtatëpikësh për të drejtat shqiptare në Luginë i pranuar edhe nga Serbia që në vitin 2013.
“Që nga ajo kohë, qeveria në Beograd ka bërë progres të limituar në implementimin e këtij plani. Asnjë nga pikat prioritare të planit nuk është realizuar në tërësi, e tek përfaqësimi në institucione qeveritare, nuk ka pasur aspak progres,” thuhet në letër.
Letra e senatorëve vjen pak muaj pas letrës së kongresmenëve Himes e Torres, po ashtu për Luginën, drejtuar Sekretarit Blinken.
