Qeveria ka detyrime ndaj Gjykatës Kushtetuese të “pas Reformës në Drejtësi”, pasi trupa gjyqësore është treguar jo thjesht luajale, por një “ushtare” e bindur e Edi Ramës, duke i miratuar disa prej vendimeve më skandaloze të marra nga “Rilindja”.
Me vendimin e Edi Ramës është bashkuar edhe Lulzim Basha, i cili deklaroi se votat e grupit të deputetevë që e mbështesin do të shkojnë në favor të rritjes së rrogave të gjyqtarëve kushtetues. Ndërkohë, shumica e deputetëve opozitarë, janë shprehur kundër këtij vendimi.
Rama “mirënjohës” me gjyqtarët kushtetues
Tre arsyet lidhen me tre vendime kontraverse të garantëve kushtetues, por që i shkojnë për shkak “Rilindjes” së Ramës me shokë- Teatri Kombëtar, Porti i Durrësit dhe mandati i Olta Xhaçkës.
- Teatri Kombëtar
Në 2 Korrik të vitit 2021, Gjykata Kushtetuese dha një vendim “anemik” për ligjshmërinë e shkatërrimit të godinës simbol të kulturës në Tiranë, Teatrit Kombëtar.
Në 17 Maj 2020, në kulmin e masave bllokuese për shkak të pandemisë “Covid-19”, Bashkia e Tiranës, e shoqëruar nga qindra forca policore, shkatërroi ndërtesën e Teatrit, në qendër të Tiranës.
Shkatërrimi i godinës lidhej me një projekt qeveritar, të quajtur “ligji Fusha”, sipas të cilit trualli ku gjendej ndërtesa kulturore do t’i jepej biznesmenit Shkëlqim Fusha për të ndërtuar kompleks kullas rezidenciale.
Pas shkatërrimit të Teatrit, çështja shkoi para Gjykatës Kushtetuese. Shumica e “garantëve Kushtetues” konstatuan se “ligji Fusha” binte në kundërshtim me ligjin themeltar të shtetit.
U duk se kjo ishte një goditje për qeverinë. Në fakt, nuk ishte aspak e tillë, pasi qeveria e Edi Ramës e kishte shfuqizuar këtë ligj para vendimmarrjes së Gjykatës Kushtetuese.
Ajo që kishin në dorë gjyqtarët kushtetues ishte përcaktimi tërësisht në kundërshtim me ligjin i vendimit të Bashkisë së Tiranës për prishjen e godinës së Teatrit Kombëtar. Për këtë pikë, gjyqtarët kushtetues u treguan “tepër të kujdesshëm”, duke deklaruar se nuk u takonte atyre të shpreheshin për atë që ishte elementi më skandaloz i aferës së Teatrit.
- Porti i Jahteve
Në 16 Qershor 2023, Gjykata Kushtetuese, me shumicë votash, rrëzoi kërkesën e 28 deputetëve të opozitës, të cilët kërkuan shfuqizimin e kuadrit ligjor që i hapte rrugën tjetërsimit të Portit tregtar të Durrësit në një kompleks rezidencial kullash e vilash, që pritet të ndërtohen nga një grup financiar me fytyrë të dukshme biznesmenin saudit, Mohamed el Alabar.
Parlamenti miratoi marrëveshjes për ndërtimin e Portit të Jahteve Durrës, në kundërshtim flagrant me kuadrin ligjor vendas dhe Marrëveshjen e Stabilizim Asociimit me Bashkimin Europian.
Megjithatë, Gjykata Kushtetuese nuk i hyri aspak thelbit të çështjes, duke deklaruar se nuk ka tagër për të shqyrtuar një vendimmarrje të tillë.
Rrjedhimisht, e la në fuqi projektin kontravers dhe personal të Edi Ramës me Alabarin.
- Strategjikja Olta Xhaçka
Në janar të vitit 2023, Gjykata Kushtetuese dha një vendim pa konkluzion për mandatin e deputetes Olta Xhaçka, e dyshuar si e gjendur në kushtet e konfliktit të interesave, pasi bashkëshorti i saj u shpall “investitor strategjik” për hotel në Palasë të Himarës.
Në korrik të vitit 2021, Komiteti i Investimeve Strategjike nën drejtimin e Edi Ramës, shpalli “investitor strategjik” ish-deputetin socialist, Artan Gaçi, bashkëshortin e Olta Xhaçkës, për ndërtimin e një kompleksi hotelier në bregun e detit.
Më tej, një vendim i qeverisë së Edi Ramës, i lejon kompleksit që të shfrytëzojë bregun e detit për një periudhë 20-vjeçare.
Opozita në Parlament nxiti ngritjen e një Komisioni Hetimor, ku kërkohej shkarkimi i Olta Xhaçkës për shkak të konfliktit të interesave. Maxhoranca e rrëzoi kërkesën për t’iu drejtuar Gjykatës Kushtetuese për të shqyrtuar mandatin e Xhaçkës,
Dy grupe të deputetëve opozitarë iu drejtuan Kushtetuese. Një grup i vogël, i përbërë nga 1/10 e deputetëve, kërkuan nga Kushtetuesja që të detyronte Parlamentin t’i drejtohej asaj gjykate me kërkesën për shqyrtimin e mandatit të Xhaçkës.
Ndërsa një grup më i gjerë i deputetëve të opozitës, ishin më konkretë, duke kërkuar nga Gjykata Kushtetuese shkarkimin e Olta Xhaçkës.
Gjykata Kushtetuese, me një “manovër” shqyrtoi fillimisht kërkesën e grupit të vogël, duke e rikthyer çështjen në Parlament. Ndërsa, kur shqyrtoi padinë e grupit më të zgjeruar, vetëm pak minuta pas të parës, u deklarua se “nuk kishte më objekt, pasi çështja i ishte rikthyer Parlamentit”.
Pra, edhe në këtë rast, Gjykata Kushtetuese nuk arriti të ngrinte dorën e ligjit kundër vendimmarrjes kontraverse të Edi Ramës.
Dhe, ky i fundit, “mirënjohës” për gjyqtarët kushtetues, vendosi t’u rrisë pagat.
