SYRI TV

Gjykata e Tiranës ka rrëzuar sërish Lulzim Bashën që kërkon të legjitimojë veten si kryetar të Partisë Demokratike, pas dhënies së dorëheqjes dhe ngritjes së strukturave paralele me bashkëpunëtorët tij të afërt.

Në seancën e sotme, në procesin e kërkuar nga Basha, gjykata mori në shqyrtim kërkesën e Gazmend Bardhit dhe Grupit Parlamentar, që kërkuan pezullimin e këtij procesi, deri sa kjo gjykatë të shprehet mbi kërkesën e bërë nga Këshilli Kombëtar i Partisë Demokratike, që në mbledhjen e datës 27 korrik, vendosi që t’i kërkojë gjykatës çregjistrimin e Lulzim Bashës dhe mosnjohjen e vendimeve të tij pas dorëheqjes.

Pasi administroi provat nga seanca e kaluar, gjyqtari Niko Rapi iu drejtua palëve mbi pretendimet e tyre, për të shkuar më pas në vendimmarrje për këtë kërkesë. Avokatët e Lulzim Bashës, kërkuan që gjykata të mos marrë parasysh kërkesën dhe të kërkojnë nga pala tjetër vënien në dispozicion të dokumenteve shtesë mbi mbledhjen e Këshillit Kombëtar.

Por kërkesa për materiale shtesë u pa e paarsyeshme nga gjyqtari, që procedoi në marrjen e vendimit kundër pretendimeve të Lulzim Bashës.

Në këtë moment, avokatët e Bashës kërkuan përjashtimin e gjyqtarit, të cilin e akuzuan për vendimmarrje të njëanshme, duke sjellë kështu një zvarritje të mëtejshme të ststusit të PD-së në dyert e gjykatave.

Avokatët e Partisë Demokratike, e cilësuan këtë lëvizje të përfaqësuesve të Lulzim Bashës si një tjetër tentativë për të lënë statusin e Partisë Demokratike të pazgjidhur, duke bërë kërkesa pa asnjë bazë ligjore apo argumentimi të tyre.

Kërkesa e avokatëve të Lulzim Bashës, solli një shtyrje të radhës për këtë proces, ku gjykata do të shqyrtojë kërkesën për përjashtimin e gjyqtarin Niko Rapi dhe seanca e radhës u caktua në datën 13 nëntor, ku pritet të merret edhe vendimi për pezullimin e kërkesës së Lulzim Bashës, që kërkon njohjen e tij si kryetar i Partisë Demokratike.