Nga fjala e Kryetarit të PD, Sali Berishës, në përgjigje të interesit të mediave, pak pasi doli nga SPAK, ku u mor në pyetje nga prokurorët e dosjes së Kompleksit Partizani. 

Berisha: "Ky ishte një akt antikushtetues, antiligjor i grupit të strukturuar kriminal Rama-Dumani-Kraja-Millonai. Së pari, ky grup i strukturuar kriminal nuk kishte asnjë kompetencë ligjore të vendoste për shkuarjen apo mosshkuarjen time në parlament. Pse?! Dispozita ligjore e Kodit të Procedurës Penale këtë të drejtë ia njeh vetëm gjykatës. Dhe këtë të drejtë ia njeh gjykatës për të gjithë personat, përveç atyre që janë persona të zgjedhur. Për personat e zgjedhur, dispozita ligjore përcakton se çështja e mosvajtjes së tyre në punë vendoset vetëm pas vendimit të prerë të gjykatës. Por këta nuk kanë ligj, nuk kanë moral, nuk kanë të drejtë. Dhe unë u them ju, se ua përsërita disa herë këtij grupi të strukturuar kriminal këtë që po them. Sigurisht kjo është pjesë e skenarit."

"Kam informacione se skapistët kanë pasur lidhje të ngushta me McGonigal"

"Kam dijeni të plotë se skapistët kanë pasur lidhje të ngushta me McGonigal. Dhe në momentin e caktuar unë do i bëj publike. Por sqaroj se ne kemi dërguar një dosje, PD ka dërguar një dosje pranë autoriteteve të SHBA me të gjitha të dhënat që ne disponojmë për aferën McGonigal."

"Të ardhmen e opozitës e shoh në fitore të sigurt. Masa ndaj meje është staliniste"

"Masa ndaj meje është një masë staliniste që tregon frikën dhe tmerrin e regjimit nga fjala e Sali Berishës. Lëre mos e pyet! Për sa i përket komunikimit, po më dolën gazetarët përpara, harroje ti se unë njoh ligj tjetër përveç ligjit të fjalës së lirë dhe komunikimit me ta.  Të ardhmen e opozitës e shoh në fitore të sigurt. Opozita ecën në fitore të sigurt."