Anëtari i Kryesisë së Partisë Demokratike Belind Këlliçi denoncoi nga selia blu, një tjetër aferë të kryebashkiakut Erion Veliaj dhe ish-vartësit të tij, Arben Maloku. Këlliçi tregoi se Arben Maloku fshihet pas kompanisë “Arb & Trans”, me të cilën ka marrë miliona euro tendera nga Erion Veliaj dhe ish-drejtori i UKT-s REdi Molla, tashmë i arrestuar për aferën “5D”.
Jo vetëm tenderat, por Këlliçi denoncoi edhe pallatin pa leje që iu sekuestrua Arben Malokut në rrugën Myslym Shyri. Sipas anëtarit të kryesisë së PD, edhe pse pas sekuestrimit të pallatit kompanisë së Malokut i ndalohej marrja e lejeve të ndërtimit dhe tenderave publik, në të vërtet ka ndodhur e kundërta.
Sipas Këlliçit, benefitet që ka marrë nga Erion Veliaj ish-vartësi i tij Arben Maloku, kanë pasur arsye faktin se Maloku drejtonte shtabin elektoral të Veliajt në 2023.
Teksa i bëri thirrje SPAK të hetojë aferat e Erion Veliajt, Belind Këlliçi paralajmëroi publikimin e të tjera fakteve për aferat e kryebashiakut me vartësin tjetër të tij, Kujtim Qefalia, të dhëna këto të bëra publike edhe nga emisioni Plug.
