Meta mbledh në Tiranë ish-presidentët dhe ish-kryeministrat e rajonit për të diskutuar për sfidat gjeopolitike

Hënë, 01 July 2024 11:33

Presidenti i Partisë së Lirisë Meta mbledh ditën e sotme në një takim rajonal, ish-presidentët dhe ish-kryeministrat e Ballkanit dhe rajonit, në një Forum Rajonal me temë ‘Ballkani dhe sfidat gjeopolitike të së sotmes dhe së ardhmes’.

Njoftimi i Partisë së Lirisë:

Nën kujdesin e veçantë të Presidentit të Partisë së Lirisë, z.Ilir Meta do të zhvillohet sot në Tiranë, Forumi shumë i rëndësishëm Rajonal me temë ‘Ballkani dhe sfidat gjeopolitike të së sotmes dhe së ardhmes’.

Me ftesë të Presidentit Meta në këtë Forum kanë konfirmuar pjesëmarrjen e tyre ish-Presidenti i Kroacisë, z.Stjepan Mesiç, ish-Presidenti i Malit të Zi dhe lideri historik i Partisë malazeze Demokratike të Socialistëve, z.Milo Gjukanoviç, ish-Kryeministri i Turqisë dhe lideri i partisë turke ‘E Ardhmja’, Prof.Ahmet Davutoglu, ish-Presidenti i Kosovës, z.Fatmir Sejdiu, Ministri i Shëndetësisë njëherazi Kryetari i ‘Aleanca për Shqiptarët’ në Maqedoninë e Veriut, z.Arben Taravari, si dhe shumë personalitete të tjera të politikës në rajon, ish-ministra të jashtëm, ambasadorë e gazetarë të shquar të cilët do të trajtojnë në këtë panel problematikat gjeopolitike të Ballkanit, Europës dhe hapësirës Trans-Atlantike.

Disa nga çështjet thelbësore që do trajtohet në këtë Forum Rajonal do të jenë domosdoshmëria e forcimit të bashkëpunimit rajonal, dimensioni i demokracisë dhe sfidave të saj përballë kërcënimeve të regjimeve autokrate, si dhe përshpejtimi i proceseve integruese të vendet tona në Bashkimin Europian.

Ky aktivitet shumë i rëndësishëm, që nis sot në ora 17:00, i ndarë në dy panele, do të transmetohet live për të gjitha mediat.