Një qytetar i Laçit ka shkuar në takimin me kryeministrin Edi Rama me një trastë plot me barna, duke u ankuar se nuk rimbursohen më dhe tashmë i kushtojnë plot 215 mijë lekë.

Qytetari ka thënë ka Hepatit B dhe ka bërë ndërhyrje në zemër, duke e patur të pamundur të punojë, ai s’ka sesi të paguajë për barnat që nuk i rimbursohen më.

Por Rama, që dy ditë më parë ka lëshuar një urdhër për kufizimin e listës së barnave të rimbursueshme, i ka thënë se lista në fjalë “ka krijuar konfuzion” dhe “do pak kohë sa të ambientohen” autoritetet përkatëse.

DEBATI:

Qytetari: Hepatit B, kjo ishte bërë 215 mijë lekë. Unë jam i papunë, kam bërë ndërhyrje nga zemra, nuk më lejohet më të punoj. Tani unë 215 mijë lekë nuk i marr më dot këto.

Rama: Ça të thanë që kanë dalë nga lista e rimbursimit?

Qytetari: Po kanë dalë

Rama: Mirë, ka disa ditë që është miratuar lista e re dhe ka njëçik konfuzion

Qytetari: Mos qeshni se e kam nga shëndeti

Rama: Po le të qeshin njëcikë

Rama: Është një llok konfuzioni që është krijuar nga lista e re

Qytetari: Kam edhe ilaçet e zemrës

Rama: O zotëri, pas mbledhjes unë nuk do iki pa i sqaruar ilaçet me ty