Në reagimin kundër qëndrimit të Edi Ramës, i cili i doli në mbrojtje Fatmir Xhafës, kryedemokrati Lulzim Basha lajmëroi qeverinë se reagimi opozitar do të jetë i fortë. Basha tha se kundërpërgjigja vjen për tiu kundërvenë inkriminimit të qeverisë . “Në emër të Partisë Demokratike, i siguroj shqiptarët dhe partnerët ndërkombëtarë se ne do ta vazhdojmë edhe më fuqishëm betejën me krimin e organizuar dhe do të përballemi me të njëjtën forcë me qeverinë që punon për krimin e organizuar dhe jo për qytetarët e ndershëm të këtij vendi” tha Basha.

Rama në deklaratën e tij kërcënoi opozitën se do të burgosë personat që denoncojnë skandalet e qeverisë. Por Basha ka edhe përgjigje për këtë kërcënim. “Kërcënimi me burg i opozitës që denoncoi skandalin “Xhafaj” është skandaloz, tipik për udhëheqësit autokratë dhe të inkriminuar. Ne as nuk jemi trembur dhe as nuk tërhiqemi nga sulmet e një kryeministri që kërcënon me burg opozitën, por jo kriminelët dhe trafikantët e drogës!” tha Basha.