“Ekonomia e Ballkanit Perëndimor është kryesuar nga Shqipëria, kur ajo qeverisej nga Sali Berisha”

Ky është përfundimi në të cilin ka arritur Instituti i Vjenës për Studime Ndërkombëtare, që cilësohet si një nga institucionet më prestigjoze në botë për kërkimet ekonomike.

Instituti i Vjenës vëren se në tetë vitet e qeverisjes së Partisë Demokratike, Shqipëria ishte vendi që pati rritjen ekonomike më të lartë në Ballkanin Perëndimor, si dhe vendi që ndërtoi më shumë rrugë të reja duke lënë pas edhe vendet më të mëdha si Serbia.

 “Sali Berisha ishte kryeministri i Shqipërisë në vitet 2005-2013, ndërsa Hashim Thaçi në Kosovë gjatë 2009-2014. Ishte pikërisht gjatë këtyre periudhave, kur u ndërtuan autostradat e mëdha që çuan në lidhjet e kryeqyteteve të dy vendeve,” thuhet në raport.

Sipas raportit, në periudhën 2005-2013, Shqipëria ndërtoi 320 kilometra autostrada të reja dhe mijëra kilometra të tjera rrugë të një shkallë më të ulët duke lënë pas me diferencë të theksuar të gjitha vendet e tjera.

Sipas Institutit të Vienës, përgjatë viteve 2005-2013, Shqipëria nuk e ka udhëhequr Ballkanin Perëndimor në modernizimin e infrastrukturës, por edhe për rritjen ekonomike. Sipas raportit, gjatë tetë viteve të qeverisjes së Partisë Demokratike, ekonomia shqiptare u rrit me 48 për qind në total.

Por pas vitit 2013, ndërtimi i rrugëve në Shqipëri është pezulluar plotësisht. Që nga ardhja në pushtet e qeverisë së majtë, në vend nuk është ndërtuar asnjë kilometër rrugë e re, jo vetëm autostradë, por edhe rrugë të gradave më të ulëta.