Është e pamundur që në një sezon të Dance With Me të mos diskutohet të paktën një çift për një lidhje të mundshme dashurie. Ju, me siguri, e mbani mend mirë sa shumë u përfolën për një ribashkim të mundshëm Roza dhe Stine, pas disa viteve të ndarë, kur u bënë çift bashkë në DWM. Të dy kishin jetë tjetër shumë kohë pas ndarjes, por kjo nuk i pengoi aspak fansat e të dyve për të menduar se diçka mund t’i rikthente sërish.

Edhe sezonet e tjera të spektaklit të kërcimit kanë nxitur gjithmonë dyshime se një romancë po lind në palestrën e provave, aty ku të gjithë konkurrentët ndajnë jo vetëm ushtrimet për spektaklin, por edhe shumë pjesë të tjera të jetës së tyre.

Edhe këtë sezon, ndjekësit virtualë nuk kanë mbetur pas me dyshime, ndonëse jo rrallëherë ato janë pa vend. Romeo dhe Anjeza, një prej çifteve më simpatike të këtij edicioni, janë edhe më të dyshuarit e më të përfolurit për një romancë të mundshme në DWM 5.

Meqenëse pyetja më e shpeshtë për ta ishte “a jeni çift në të vërtetë?”, Alketa shfrytëzoi rastin për t’ua bërë live në program: “Po, jemi të dashuruar”, – iu përgjigj me ironi Romeo pyetjes së Alketës duke shtuar se ai që e ka bërë këtë paska shumë fantazi: “Jemi shumë të lumtur të dy, por besoj se është aq i pavërtetë ky lajm, saqë nuk ia vlen të flasim për të”, – tha më tej Anjeza duke e konsideruar si një shaka pyetjen ngacmuese të fansave.

Romeo, si për ta mbyllur, tha se “e kam si gocë halle, meqë Roberti e ka Leilën si motër”

Mos kini më dyshime. Anjeza dhe Romeo janë bërë miq shumë të mirë.