Kryeqyteti mbërthehet nga ethet e derbit ku jo vetëm bota e sportit do të kthejë vështrimin nga stadiumi “Selman Stërmasi”, pasi kjo pritet të jetë një sfidë e cila do të përfshijë shumë aktorë.

Interesimi i jashtëzakonshëm për të parë “live” Tirana-Partizani e ka bërë situatën shqetësuese edhe për policinë e shtetit e cila ende nuk ka vendosur nëse do të marrë përsipër mbarëvajtjen e këtij takimi.

Burime nga Policia e Shtetit për “BalkanWeb” bëjë me dije se mënyra se si po bëhet organizimi i derbit nuk është aspak në funksion të mbarëvajtjes të këtij takimi. Fakti që biletat në pjesën e tribunës janë shituar e bëjnë të pa mundur s postimin e tifozëve, pra ndryshimin e tribunave, sipas kërkesës së Policisë së Shtetit.

Kjo e bën skeptik policinë pasi distanca ndërmjet portave hyrëse të dy tifozerive është shumë e vogël dhe ajo që ndan brenda në stadium dy tifozeritë rivale është vetëm një gardh. Në kushte të tilla garancia e tifozëve nuk është e sigurt. Duke iu referuar dhe asaj që ndodhi në sfidën Skënderbeu-Partizani, Policia e Shtetit është e shqetësuar për mbarëvajtjen e këtij takimi.

Nga ana tjetër drejtuesit e klubit të Tiranës që ka përsipër organizimin e këtij takimi, janë shprehur se do të ketë një prezencë të madhe të stjuartëve të cilët do të sigurojnë perimetrin në brendësi të stadiumit “Selman Stërmasi”.