Pilotja e re gjermane Sophia Floersch përjetoi një aksident të tmerrshëm në garën e sotme në Formula 3, e cila u zhvillua në qytetin Macau.
Aksidenti ndodhi në pistën Guia, e cila shtrihet përgjatë rrugëve të qytetit Macaut.

Në xhiron e katërt të garës për Çmimin e Madh të Macaut, pilotja 18-vjeçare Floersch me një shpejtësi 273 kilometra në orë preku kufizuesen anësore të pistës dhe më pas “fluturoi” mbi gardhin dhe u përplas në platformën pranë pistës.

Spektatorët duken të tmerruar, ndërsa përplasja vonoi garën për më shumë se një orë dhe prej saj u lënduan edhe katër persona të tjerë që janë dërguar në spital bashkë me piloten Floersch.

Pilotja u transportua me plagë të rënda në spital, nga ku u vu re se ajo është në vetëdije, por ka thyer shtyllën kurrizore.

Ndërkohë, Floersch, shkroi në Twitter se ajo ishte “mirë” vetëm disa orë pas aksidentit, që erdhi si pasojë e një kontakti me pjesën e pasme të makinës së Jehan Daruvala.

Vajza ka falënderuar fansat për mesazhet e mbështetjes dhe ka konfirmuar se ajo do t’i nënshtrohet një operacioni të hënën në mëngjes.

“Dua të dinë të gjithë që jam mirë, por nesër në mëngjes do të shkoj në kirurgji”, shkroi ajo.