Shqipëria kërkon trajner për eliminatoret e Euro 2020. Sido që të shkojë ndeshja me Uellsin, pavarësisht rezultatit që do të prodhojë, Kristian Panuçi nuk do të jetë më trajneri i Shqipërisë. Kjo, jo vetëm për shkak të mungesës së rezultateve, paqartësisë që i ka sjellë lojës së skuadrës trajneri italian apo marrëdhënies aspak pozitive që ai ka krijuar me lojtarët. Presidenti i FSHF-së, Armand Duka, e ka kuptuar gafën e madhe që ka bërë duke emëruar ish-mbrojtësin italian pa eksperiencë si trajner në drejtimin e kuqezinjve dhe po përpiqet që ta korrigjojë me shumë vonesë atë zgjedhje.

Vip Sport ka mësuar se FSHF ka nisur kontaktet me menaxherët dhe personat të cilët në të kaluarën kanë sugjeruar emra trajnerësh për stolin kuqezi. Emri i Bledar Kolës ishte vetëm i pari i një numri me CV që ka filluar të vihet mbi tavolinën e Dukës nga këta bashkëpunëtorë të tij, në përpjekjen për të korrigjuar gabimin e verës së kaluar që i ka kushtuar shumë shtrenjtë Shqipërisë e cila ka bërë shume hapa mbrapa dhe ka komplikuar rrugëtimin drejt Europianit me rënien në vazon e katërt për shortin e tij.

Ndarja “konsensuale” me Panuçin do të bëhet pas ndeshjes me Uellsin, kur Duka do të takohet përsëri me trajnerin për t’i komunikuar shkarkimin nga detyra ish-mbrojtësit italian i cili rezultoi të ishte një nga zgjedhjet më të papërshtatshme për stolin e kombëtares shqiptare në dy dekadat e fundit.

Prioriteti mbeten trajnerët e huaj, ndërsa CV-të do të fillojë të shqyrtohen që në javët e ardhshme, për të bërë një zgjedhje para fundit të vitit. Kjo, pasi në mars fillojnë menjëherë eliminatoret e Europianit dhe trajneri i ri nuk do të ketë shumë kohë në dispozicion për të përgatitur skuadrën e cila duket e shpërbërë falë epokës së drejtimit të Panuçit