Komiteti Ekzekutiv i UEFA ka aprovuar kompeticionin e ri për klube, i cili do të startojë që nga viti 2021. Zyrtarizimi erdhi pas mbledhjes së bërë në Dublin, dhe është njoftuar nga faqja zyrtare e federatës evropiane të futbollit.

Ky do të jetë kompeticioni i tretë për klube, së bashku me Champions League dhe Europa League, ku pjesëmarrëse në fazën e grupeve do të jenë 32 skuadra. Formati do të jetë i njëjtë si me Europa League, ku do të luhen 141 ndeshje, e më pas fituesi do të ketë të drejtën për të marrë pjesë në Europa League sezonin e ardhshëm.

Turneu i ri, i cili ende nuk ka një emër zyrtar, do të luhet të enjteve, dhe pritet që të sigurojë minimalisht 34 vende pjesëmarrëse me klubet e tyre nga 26 aktualisht, në kompeticionet e organizuara nga UEFA. Presidenti Aleksandr Ceferin deklaroi se ky turne do të përfshijë akoma më shumë klubet evropiane, dhe ideja lindi nga shoqata evropiane e klubeve.

Njoftime më të reja pritet të vijnë gjatë muajve në vazhdim, por gjithsesi ky është një lajm mjaft i mirë për tifozët e vendeve të vogla, të cilët do të kenë mundësi të shikojnë ekipet e tyre e zemrës në një kompeticion të organizuar nga UEFA.