Një tjetër rezultat surprizë është regjistruar në Kupën e Amerikës. Pas Argjentinës dhe Brazilit, është radha e Uruguait për të bërë një hap fals, teksa ka barazuar ndaj Japonisë me rezultatin 2-2, në takimin e zhvilluar në orët e parë të mëngjesit të datës 21 qershor.

Japonia, e cila është mysafire në këtë kompeticion, kaloi 2 herë në avantazh, por nuk arriti ta ruante epërsinë, teksa në fund u largua nga stadium i Gremios me 1 pikë.

Mijoshi hapi serinë e golave, teksa në minutë e 25-të kaloi në avantazh kombëtaren japoneze. Vetëm 7 minuta ka zgjatur festa, pasi në minutën  e 32-të Suarez barazoi shifrat nga pika e bardhë e penalltisë.

Miqtë nga Japonia nuk u dorëzuan, teksa në minutën e 59-të, kaluan përsëri në avantazh me po të njëjtin futbollist, sulmuesin Mijoshi.

Për të shmangur humbjen e skuadrës së Tabarez mendoi mbrojtësi i Atletiko Madridit, Himenez, i cili në minutën e 66-të, vulosi takimin në 2-2. Më këtë barazim, Uruguai u ngjit në kuotën e 4 pikëve, ndërkohë që për japonezët, kjo ishte pika e parë.