Shqipëria zhvilloi një paraqitje shumë të dobët ndaj kombëtares së Francës. Kjo disfatë nuk lë shumë diskutim ndaj edhe vlerësimet për futbollistët kuqezi nuk kanë qenë shumë të larta, përkundrazi. “France Football” i ka masakruar me notat e saj lojtarët e Shqipërisë, pasi duke marrë si maksimumin notën 10, ka vendosur vetëm një futbollist si kalues mes lojtarëve kuqezi.

Ai është Keidi Bare, i cili në ndeshjen e tij të parë zyrtare luftoi në mesfushë ndaj emrave shumë të njohur të futbollit botëror, duke merituar notën 5. Gjashtë futbollistë të tjerë kanë notën 4 (Ismajli, Gjimshiti, Mavraj, Ramadani, Abrashi dhe Uzuni), ndërsa katër futbollistë morën notën 3 (Strakosha, Hysaj, Roshi dhe Balaj). Revista e njohur franceze ka zgjedhur Hysajn si imazhin e disfatës kuqezi. “Në mes të një mbrojtjeje shqiptare shpesh të rrethuar, ai ishte personi i cili vuajti më shumë dhe me diferencë të thellë.

Shumë pak i frymëzuar në pozicionimin e tij, në vështirësi të madhe në duele, ai dukej shumë i ngathët për të shpresuar që të provonte t’i bënte ballë kundërshtarëve kaq të shpejtë. Dhe në mënyrë logjike ai fuste ujë nga të gjitha anët, si të ishte kundër Koman, ashtu edhe kundër Grimzan, i cili e dribloi dhe e la në vend pas pushimit të ndeshjes, Lemar apo të gjithë ata që ndërmorën aventura në zonën e tij. Një ndeshje që do të mbetet padyshim në kokë, aq shumë vuajti”, shkruan “France Football”: për mbrojtësin kuqezi.