8 tituj kampion në 8 vitet e fundit janë një tregues i qartë i dominimit absolut të Juves në Serie A. Të konkurrosh “Zonjën e Vjetër” në fushë është kthyer në një mision shumë të vështirë ndërsa në shifra dhe paga Juve është e thjeshtë e pakapshme. Dominimi shihet qartë në listën e lojtarëve më të paguar në Serie A për sezonin 2019-2020. Nuk është aspak një rastësi që bardhezinjtë janë kthyer në një superfuqi në Itali, mjafton të shohim lojtarët që kanë në dispozicion dhe pagat që ata përfitojnë.

Në majën e listës së lojtarëve më të paguar qëndron C.Ronaldo. Diferenca e tij me ndjekësit është po aq e madhe sa dhe fama e tij. CR7 përfiton në Torino 31 milion euro në sezon. Në vendin e dytë qëndron transferimi më i bujshëm në këtë verë, Romelu Lukaku.

Sulmuesi belg përfiton tek Inter 8,5 milion euro në sezon. Në vendin e tretë me 7,5 milion euro renditet De Ligt. Pavarësisht se në vitet e fundit është dhënë gjithnjë në huazim, Higuain vijon të qëndroj në listën e lojtarëve më të paguar.

Argjentinasi përfiton po aq sa De Ligt, 7,5 milion euro në sezon. 7 milion përfitojnë dy afrimet e verës të Juves me parametra zero, Rabiot dhe Ramsey, shumë e njëjtë me atë që përfiton dhe Dybala. Mbyll 10-tshen e parë një tjetër Juventin, Miralem Pjanic.

Për të gjetur një lojtar që nuk është në radhët e Juves duhet të shkojmë në vendin e 11-të ku renditet Donnarumma i Milan me 6 milion euro në sezon. Lojtari më pak i paguar në Serie A është Edgaras Dubickas i Lecces me 20 mijë euro në sezon.