Kryetari i opozitës Lulzim Basha i ka kërkuar kryetarit të Kuvendit Gramoz Ruçit të pezullojë urgjent seancën derisa në të të jenë të pranishëm kryeministri Edi Rama dhe ministri i Brendshëm Fatmir Xhafaj.

Basha  ka ngritur zërin në foltore duke deklaruar se “Saimir Tahiri u lirua dhe e njëjta skemë po ndiqet për të mbrojtur vëllezërit Xhafaj. Në këto kushte është e pamendueshme që Bundestagu dhe cilido institucion europian të realizojnë atë që kërkojmë, negociatat. Zoti kryetar! Pezullo seancën! Thirr këtu Edi Ramën dhe Fatmir Xhafajn”

Ruçi ka kërkuar vazhdimisht lirimin e foltores nga Basha, por ai nuk është larguar i mbështetur nga deputetët e opozitës.

Ruçi ka replikuar me deputetët e PD-së dhe si përfundim ka vendosur të ndërpresë seancën e parlamentit, për të mos lejuar kreun e opozitës Lulzim Basha që të vazhdojë fjalën e tij.