Pas rrugës Durrës-Kukës, edhe 4 akse të tjera rrugore do të bëhen me pagesë. Lajmi është bërë i ditur nga kreu i Autoritetit Rrugor Shqiptar, Afrim Qendro për TV “Ora News”. Ai deklaroi se është duke u studiuar mundësia e aplikimit të pagesës në disa akse kombëtare në vend, sipas modelit të rrugës Durrës-Kukës. Por sipas tij, ende nuk ka një vendimmarrje, pasi aplikimi i takës sipas modeleve botërore është ende në fazën e studimit dhe po ashtu varet nga ecuria e këtij procesi në rrugën Durrës-Kukës.
“Po diskutohet edhe aksi Tiranë-Fier-Vlorë, po diskutohet edhe aksi Tiranë-Elbasan, edhe aksi Tiranë-Durrës, ndoshta edhe Gjirokastër-Sarandë. Por këto janë pjesë e studimeve, pjesë e analizave në të cilat nuk merr pjesë vetëm autoriteti rrugor, këto janë vendime të rëndësishme që i merr qeveria shqiptare”, u shpreh Qendro.
Ai bëri të ditur gjithashtu, se ndërhyrja emergjente Tiranë-Durrës e cila nis në 11 qershor do të përfundojë para 1 korrikut dhe nuk do të cënojë sezonin turistik.
“Që do të thotë ne nuk do të bëjmë mbushje të gropave, por do të marrim segmentet më të dëmtuara, do ti hiqet asfalti aktual dhe do të shtrohet.Ne këtë punë do ta mbarojmë deri në datën 1 korrik, që me fillim normal të sezonit turistik kjo rrugë të jetë e kalueshme”, deklaroi Qendro.
ARRSH bashkë me kontraktorin është në fazën e studimit edhe për ndërhyrjen që do të bëhet në aksin Lezhë-Shëngjin, kur shembja e një masivi gurësh goditi një autobus dhe plagosi dy gra javën e kaluar.
“Ne jemi në kontakt me konsulentin edhe me bankën për të bërë një investim emergjenc. Për shkak të shirave ne bëjmë një monitorim të skarpateve ku shtrihen këto rrugë. Nuk kishim ndonjë indikator dhe asnjë të dhënë që mund të kishim rrëshkitje. Këto gjëra ndodhin! Ne jemi në bisedim me BB për të ndërhyrë në këtë segment që fillon nga qyteti i Lezhës deri në Shëngjin.
Është një zonë që paraqet një rrezikshmëri të tillë. Jemi në tratativa për të bërë qoftë pastrime qoftë veshje me rrjet. Presim shumë shpejt që njërën nga masat që parashikon kontrata ta realizojmë”, u shpreh Qendro.
Kreu i ARRSH njoftoi se institucioni që drejton po përgatit projektet dhe do të hapë punimet në tre lotet për Unazën e Madhe të Tiranës.
