Lionel Messi është “i pakënaqur” në Kupën e Botës, me presionin e shpresave të Argjentinës për të fituar Botërorin, që peshon mbi supet e tij, sipas ish-shokut të kombëtares, Pablo Zabaleta.

Messi ka luftuar deri tani, në Rusi, duke humbur një penallti në barazimin 1-1 me Islandën, përpara se të terratiset plotësisht nga humbja shokuese 3-0 ndaj Kroacisë.

Shpresat e kualifikimit në grup të Argjentinës janë në teh të thikës, me të besuarit e Jorge Sampaolit, që do të përballen me Nigerinë, të martën. Dhe Zabaleta, i cili luajti 58 ndeshje për Argjentinën, nënvizon se sa shumë pritet prej superstarit të Barcelonës.

“Leo Messi më i lumtur që pashë në Botëror ka qenë ai, përkrah të cilit luaja për Argjentinën, në vitin 2012. Ai shënoi një “hat-trick” kundër Brazilit në Nju Jork dhe luajti gjithë lojën me liri dhe buzëqeshje në fytyrë, – shkroi ish-kapiteni Albiceleste në kolonën personale për “BBC Sport”.

– Gjuha e tij e trupit ishte krejtësisht e kundërta, përpara ndeshjes me Kroacinë, të enjten. Për ta parë Leon aq të pakënaqur në këtë Kupë Botërore është një shqetësim i vërtetë. Ai është miku im dhe i ish-shok kombëtareje ndiej shumë keqardhje. Është shumë e pazakontë ta shohësh atë ashtu, por ishte një shenjë e asaj që po ndodhte në kokën e tij.

Në raste si këto, ka një presion të madh tek ai, sepse njerëzit presin shumë, duan që të bëjë gjithçka për ekipin kombëtar. Unë nuk isha i befasuar që ai luftoi, në atë që ishte një humbje katastrofike për ne. Si një lojtar, që jam vetë, unë e di që, nëse shkoni në një lojë dhe nuk e gëzoni atë, atëherë është shumë e vështirë për të luajtur mirë”.

Ndeshja e Argjentinës kundër Nigerisë ka një rëndësi të veçantë për shkak të faktit se mund të jetë e fundit e Messit në një Kupë Botërore. Messi është 31 vjeç dhe ende nuk e ka shijuar lavdinë e Kupës së Botës. Ai ka fituar vetëm një medalje ari në Olimpiadë për vendin e tij, në vitin 2008, me Zabaleta duke besuar se bagazhi i dështimeve të mëparshme peshon rëndë:

“Mendoj se po bëhet gjithnjë e më e vështirë për Leon, për të luajtur për Argjentinën. Ai festoi 31-vjetorin ditën e diel, kështu që po rritet dhe nganjëherë mentalisht ju mund të ndiheni të lodhur, gjithashtu. Një pjesë e kësaj është në historinë e tij me Argjentinën.

Kjo skuadër ka humbur tri finalet e fundit, që ka luajtur: Kupën e Botës 2014 dhe “Copa America” në vitet 2015 dhe 2016. Në Argjentinë, kjo nuk është e mjaftueshme. Për disa njerëz, dhe për një pjesë të mediave, ju duhet të fitoni. Vetëm arritja në finale nuk është e pranueshme.

Kështu, humbja e tri finaleve në katër vjet ka qenë e vështirë psikologjikisht dhe mendërisht për të gjithë në atë skuadër, sidomos për Leon. Është e vështirë kur njerëzit në vendin tuaj të trajtojnë si një humbës. Ata e shohin atë duke fituar trofe çdo sezon me Barcelonën, prandaj presin që të bëjë pikërisht të njëjtën gjë në ekipin kombëtar”.