Të katër personat e arrestuar nga policia për kalimin nga Belgjika drejt Shqipërisë të 3.4 milionë eurove kanë mohuar të kenë pasur pjesë në këtë shumë parash.

Shoferi i trajlerit dhe pronari Edi Lika kanë pohuar se paratë nuk janë të tyret, por të dy kushërinjve Elvis dhe Alfred Vladi.

Ndonëse kanë pranuar se 3.4 milionët e eurove janë të dy kushërinjve të shpallur në kërkim, 4 të arrestuarit nuk kanë pranuar të japin detaje mbi vendin dhe kohën e futjes së parave në dy makinat ku u gjetën ato, gjatë kontrollit të policisë në Durrës.

Drejtuesi i automjetit Agim Çeka dhe 3 të arrestuarit e tjerë rrëfyen itinerarin që kishin kryer automjetet për të ardhur në Shqipëri.

Makinat janë blerë te një koncesionar në Belgjikë dhe më pas kanë udhëtuar në Ahen të Gjermanisë. Aty automjeteve u janë plotësuar deklaratat doganore dhe kontratat e shit-blerjes në agjencinë në pronësi të Ilir Doçit.