Pas mbarimit të provimeve të maturës tashmë nxënësve u duhet që të aplikojnë për në universitet. Datat për aplikimin online për në universitet janë që nga 30 korrik deri në 4 gusht. Procedura do jetë si ajo e një viti më parë ku maturantët aplikojnë online për 10 preferenca. Ajo që duhet të kenë parasysh maturantët për këtë vit janë edhe kriteret më shumë se si duhet të renditin preferencat.

“Ata duhet të bëjnë një përllogaritje që është 50% për notën mesatare të 3 viteve të shkollës së mesme, plus mesataren e notave të provimeve të maturës shtetërore. Nëse kanë një mesatare mbi notën 6, mund të aplikojnë në të gjitha programet, por jo tek mjekësia, që është mbi 8 për infermierinë, 8.5 për mjekësinë dhe mbi 7 për mësuesinë. Nëse e kanë mesataren mbi këtë notë, vetë sistemi nuk ua nxjerr, ata do të duan të të kapin ato degë por sistemi nuk ua nxjerr fare, pra sistemi nuk hapet fare”, deklaroi Rezana Vrapi, Drejtore e Qendrës së Shërbimeve.

Formularin A2 pritet ta plotësojnë rreth 26 mijë maturantë, të cilët në çdo rast do të kenë edhe një shans të dytë, nëse nuk fitojnë tek i pari.

“Në raundin e dytë që do të jetë diku në muajin shtator janë ata që nuk kanë fituar në raudin e parë, por me degët që kanë mbetur tashmë”, deklaroi Vrapi.

Për maturantët që duan të guxojnë sërish për të arritur degën e preferuar ekziston e drejta e riaplikimit.

“Në fund të fazës së parë, çdo maturant ka të drejtë çregjistrimi. Ata do të kenë 48 orë kohë për ta bërë këtë”, deklaroi drejtoresha Vrapi.