Gazetari investigativ Artan Hoxha ka treguar detaje të reja nga rrëmbimi i shtetasit Ervis Troqe në mes të Vlorës më 17 Korrik të këtij viti.
Sipas Hoxhës, Ervis Troqe është rrëmbyer gjysmë ore para se të fejohej, madje ai ka shtuar se lokali dhe gjithçka tjetër ishte bërë gati, ndërsa Troqe ka dalë për një moment për të marrë diçka jashtë dhe nuk është kthyer më.
"Ai (Babai i Troqes) ia ka fshehur dhe bashkëshortes së tij zhdukjen e të birit sepse kanë qenë dhe të sëmurë. I ka thënë se djali i tyre kishte emigruar jashtë vendit. Ai është zhdukur gjysmë ore para fejesës. Kishte bërë gati gjithça por ka dalë në një moment për të marrë diçka të vogël, dhe nuk është kthyer më", tha Artan Hoxha në emisionin Repolitix, ReportTv.
