Studentët nuk heqin dorë nga protestat deri në plotësimin e 8 kërkesave. Ndërkohë që kryeministri Rama i kërkon dialog, ditën e sotme ata kanë thirrur një protestë mbarëkombëtare.

Sipas planit të bërë publik nga vetë studentët ata edhe sot do të vazhdojnë me bojkotin e mësimit.

Ata kanë njoftuar se nga ora 9-11 do të mblidhen dhe do të protestojnë para fakulteteve dhe më pas në orën 11:30 deri në orën 14:30 do të jenë para kryeministrisë.

Ora 08:00 -200 studentë nga Korça nisen drejt Tiranës

Nga Korça janë nisur rreth 200 studentë, të cilët do t'i bashkangjiten protestës që të zhvillohet në Tiranë. Gazetarja e Ora News, Ledjona Dervishi raporton se studentët janë nisur që në orët e para të mëngjesit me 4 autobusa. Kauza e studentëve është jo politike, prandaj në protestë janë thirrur të gjithë shqiptarët, pa dallime. Edhe një ditë më parë, kryetarja e LSI, Monika Kryemadhi i bëri thirrje të gjithë të rinjve të LRI, që t'i bashkohen protestës së sotme.

Njoftimi i studentëve për planin e protestës

 “Nesër, (sot) 17 dhjetor protesta vazhdon në Fakultete (9-11) dhe më pas para Kryeministrisë. Në orën 9-11 organizohemi përpara fakulteteve për të ndërgjegjësuar çdonjërin nga ne  mbi kauzën tonë të drejtë. Studentët të pajisur me foni do të shpalosin në detaje kërkesat e tyre specifike për arsim cilësor. Folës të ndryshëm nga të gjitha programet e studimit dalin dhe denoncojnë me forcë problemet tona, padrejtësinë që na bëhen përditë, të cilat duhet të marrin fund. Studentët artikulojne kërkesa specifike për autoritetet drejtuese të Fakulteteve/Universiteteve. Përfaqësues nga fakultete/Universitete të tjera përshëndesin protestën dhe prezantojnë problemet e përbashkëta. Në orën 11:30 para kryeministrisë protesta vazhdon me bashkim të studentëve. Në orën 14:30 shpërndahemi qetësisht e në mënyrë qytetare",  shkruhet në njoftimin për protestën e sotme.