Për dorëheqjen e kryeministrit të Kosovës, Ramush Haradinaj, ka pasur reagime të shumta në Prishtinë e Tiranë. Shumica vlerësojnë aktin e tij prej shtetari dinjitoz dhe shprehin mbështetje për të. Por ajo që bie në sy deri më tani të paktën, është mungesa e një reagimi nga kryeministri Edi Rama.

Përse hesht Edi Rama?! Reagimi i vetëm nga qeveria shqiptare është ai i ministrit të Diasporës, Pandeli Majko. Po kështu pati reagim edhe nga ish-ministri Ditmir Bushati. Kryeministri i Shqipërisë kohët e fundit kishte një ftohje me Ramush Haradinajn pas deklaratave të këtij të fundit se Rama e kishte detyruar në Samitin e Berlinit që të ndryshonte mendim për taksën ndaj Serbisë. Krisja në raportet mes tyre u re edhe në mungesën e Ramës në ceremoninë e inagurimit të autostradës ‘Arbën Xhaferi’, që lidh Prishtinën me Shkupin.

Nga ana tjetër Edi Rama është afishuar publikisht afër Hashim Thacit për projektin e ndarjes së Kosovës. Ndaj tyre ka patur edhe akuza të shumta në media dhe nga opozita se po mbronin në këtë mënyrë tezat e Beogradit zyrtar. Me dorëheqjen e Ramush Haradinajt pritet që Kosova të shkojë në zgjedhje të parakohshme.

LAPSI.al