Një peshkatar shqiptar është shpëtuar nga Roja Bregdetare italiane në kanalin e Otrantos, pasi motori i barkës së tij pësoi avari dje rreth orës 14:30. 

Peshkatari ishte nisur për peshk nga Vlora mbrëmjen e së martës me një barkë druri pesë metra të gjatë, pa instrumente nautike dhe gjendej 25 milje larg bregut të Otrantos, ndërkohë që kushtet e motit ishin përkeqësuar.

Alarmi u dha nga centrali operativ i Rojës Bregdetare në Romë që i ngarkoi menjëherë operacionin e shpëtimit Drejtorisë Detare të Barit, e cila nxori në det motovedetat CP 886 nga Santa Maria di Leuca edhe CP 768 nga Otranto. Nga njësia ajrore e Rojës Bregdetare të Katanias u nis edhe helikopteri ATR 42 Manta.   Kërkimet vazhduan deri në 17:30 kur thuajse ishte errur kur italianët arritën të dallonin peshkatarin shqiptar, tepër i shqetësuar ndërkohë nga qëndrimi i gjatë në det dhe përkeqësimi i motit. 50-vjeçari u arrit nga motovedeta CP 886 dhe u transportua në Otranto ku e priste ambulanca e urgjencës. Përveç frikës së madhe që kishte kaluar, peshkatari shfaqte shenja të dukshme hipotermie dhe ankohej për dhimbje të forta në bark.