Nëpërmjet ambasadorit të Japonisë në Tiranë Makoto Ito, ka ardhur lajmi i mirë se Japonia do t’i dhurojë Shqipërisë ilaçin që ajo ka gjetur për përdorimin kundër koronavirusit. Sipas ambasadorit vendi ynë është në listën e 20 shteteve që janë përygjedhur për këtë ndihmë specifike nga Japonia.
Ambasadori Ito tha gjithashtu se po bashkëpunohet dhe është në diskutime me qeverinë shqiptare, për të siguruar këtë ilaç edhe për Shqipërinë përmes Zyrës së Kombeve të Bashkuara për Shërbimet e Projekteve (UNOPS).
“Qeveria jonë ka vendosur që t’i sigurojë falas ilaçin “Avigan” në më shumë se 20 vendeve që duan të përdorin këtë medikament antigripal për të trajtuar pacientët me koronavirus ndërkohë që provat klinike vazhdojnë. Shqipëria është një ndër ato 20 vende të cilat do ta marrin këtë ilaç”, tha ambasadori.
Ilaçi tregtohet nën emrin komercial Avigan, me emërtimin shkencor Faripiravir, dhe konsiderohet si një mjet antivirus farmaceutik, që po përdoret kundër formave të reja të viruseve gripale, të panjohura më parë. Nisur nga suksesi që ka pasur në mposhtjen e kësaj sëmundje, edhe Italia e futi pjesë e protokollit shëndetësor në trajtimin e të sëmurëve të prekur nga Covid-19.