Ka shkuar në 7 numri i të infektuarve me koronavirus në Kurbin. Janë 5 raste të reja që janë konfirmuar në 24 orët e fundit dhe të gjitha kanë lidhje me fasonerinë e Krujës. Nga 9 rastet e reja në vend, 5 ishin vetëm në Kurbin.
Rastet e reja në Kurbin janë gra që kanë punuar në këtë fasoneri, ndërkohë që dyshohet se kanë infektuar edhe familjarët e tyre, por pritet testi për ta konfirmuar.
3 ditë më parë gazeta Mapo raportoi për fasonerinë në Krujë si një vatër të re infeksioni. Fasoneria u mbyll vetëm pasi u konfirmua rasti i parë me COVID-19. Pavarsisht se disa gra kishin shfaqur simptomat, nuk u mor asnjë masë.
Duket se fasoneritë po kthehen në një burim të ri për përhapjen e koronavirusit. Në fasonerin e Krujës, mendohet se punonin rreth 150 gra./MAPO
