Qyteti bregdetar i Vlorës u trondit mbrëmjen e djeshme nga dy shpërthime me lëndë eksplozive të vendosura në dyert e dy banesave të ndryshme. Shpërthimi i parë ka ndodhur rreth orës 02:30 në katin e 5-të të një pallati në lagjen “Lirim”, pranë derës së banesës së shtetasit Fation Bata 30 vjeç, e cila ndodhet përballë Drejtorisë së Policisë vendore.
Bata jetonte me nënën e tij Nadire Bata, e cila është dërguar në spital pas shpërthimit pasi ka pësuar tronditje.
Fatjon Bata nuk rezulton person me precedentë të mëparshëm penalë, ndërsa nuk dihen ende shkaqet e vendosjes së tritolit pranë derës së banesës së tij. Nga shpërthimi nuk ka pasur të lënduar, por dëme materiale. Shpërthimi ishte i fuqishëm dhe ka alarmuar edhe fqinjët e tjerë të pallatit, banesat e të cilëve janë dëmtuar.
Ndërkohë shpërthimi i dytë ka ndodhur rreth orës 03:30, në lagjen “15 Tetori”, pranë portës së banesës së shtetasit G.Ç., 69 vjeç. Nga shpërthimi ka pasur vetëm dëme materiale. Policia vijon hetimet për zbardhjen e shkaqeve dhe kapjen e autorëve në të dy rastet./BalkanWeb/
