Bashkimi i Prodhuesve Shqiptarë i kërkoi sot qeverisë të ulë tarifat për kalimin në Rrugën e Kombit dhe të shtyjë të paktën deri në shtator aplikimin e tyre.

Me anë të një shkrese zyrtare drejtuar Ministrisë së Infrastrukturës dhe Energjisë, BPSH shprehet se tarifat e kalimit në këtë aks rrugor janë shumë të larta dhe do të ndikojnë drejtpërsëdrejti në rritjen e kostove për bizneset dhe në çmimet e produkteve për konsumatorët.

“Bashkimi i Prodhuesve Shqiptarë ka analizuar problemet dhe kostot që shkaktohet nga kjo tarifë për eksportuesit, si dhe ndikimin që do të ketë me konkurrueshmërinë e produkteve me vendet e rajonit,” vazhdon më tej letra e kompanive.

Ndër të tjera, BPSH kërkon dhe që Ministria e Infrastrukturës të përfshijë në procesin e vendimmarrjes për tarifat e Rrugës së Kombit, kompanitë private dhe grupet e interesit që përfaqësojnë një grup kategorish të produkteve shqiptare.

Deri më tani, Ministri Gjiknuri ka deklaruar se do të ketë një rishikim të tarifave për banorët e zonës, por nuk premtuar asnjë ndryshim për bizneset dhe kompanitë që janë përdoruese të shpeshta të rrugës.

Vendosja e tarifave për kalimin e aksit Milot-Morinë u lajmërua nga Qeveria Rama më 23 mars 2018 dhe do të fillonin të mblidheshin nga kompania koncesionare më 15 prill.

Tarifat e miratuara nga qeveria janë këto:

 – Motorët do të paguajnë 2,5 euro për çdo kalim, pra 5 euro vajtje-ardhje;

 – Autoveturat do të paguajnë 5 euro për çdo kalim, pra 10 euro vajtje-ardhje;

 – Autobusët dhe kamionçinat do të paguajnë 11,2 euro për çdo kalim, pra 22,4 euro vajtje-ardhje;

 – Kamionët e mesëm do të paguajnë 16,2 euro për çdo kalim, pra 32,4 euro vajtje-ardhje;

  – Kamionët e rëndë do të paguajnë 22,5 euro për çdo kalim, pra 45 euro vajtje-ardhje.

Por protestat e banorëve të qarkut Kukës bllokuan përkohësisht vendosjen e tarifave dhe detyruan Kryeministrin Rama të nisë një fushatë informuese lidhur me këtë vendim. Nuk dihet ende se sa do të reduktohet tarifa për banorët e zonës, por dihet me siguri që kalimi në aksin Milot-Morinë nuk do të jetë falas për askënd.