Veliaj e quan diçka të paimagjinueshme mbjelljen e pemëve.

Madje u ka shpërndarë certifikata nderi punonjësve të ndërmarrjes së pastrimit në Tiranë, certifikata që as rrogën nuk ua rritin e as kushtet nuk ua përmirësojnë.

Gjithsesi, në kohën kur Veliaj po fliste me superlativa për punën e tij, në anën tjetër të kryeqytetit është duke u shkatërruar rruga e fundit që kishte ngelur me kalldrëmin 200-vjeçar.

Në foto shihet se si rruga historike “Thanas Ziko” që mbart edhe vlera kulturore është duke u shkatërruar plotësisht.

Ndërkohë që në Tiranë ekzistojnë qindra rrugë të pashtruara fare, të hapura prej muajsh për tu shtruar dhe rrugë pa kanalizime që mbyten në një pikë ujë, bashkia vendos të shkatërrojë të vetmen rrugë identifikuese për traditën e Tiranës.

Në çdo vend të botës ku  ka një lloj respekti për objektet që mbartin vlera kulturore, ajo rrugë mund të restaurohej në atë stil që ishte dhe jo të shkatërrohej. Por Veliaj, merr të gjitha kompetencat të shkatërrojë identitetin e tiranasve, e bashkë me të edhe kujtesën të cilën e ruajnë qysh prej fëmijërisë.

Kujtojmë që një fenomen i tillë po ndodh edhe në Sarandë, ku bashkia shkatërroi shkallët historike të qytetit për t’i zëvendësuar me mermer, i cili nuk e identifikon aspak qytetin bregdetar.