Kryebashkiakja Ademi inspekton punimet në Rrugën e Mushanit në Dajç

Fillon një tjetër projekt i ri në Bashkinë Shkodër! Nisin punimet për segmentin e parë të rrugës së Mushanit, që arrin një vlerë 9.6 milionë lekë dhe do të ndikojë në përmirësimin e kushteve të jetesës për rreth 2 mijë banorë të kësaj zone.

Bashkia e Shkodrës ka nisur rikonstruksionin e rrugës së fshatit Mushan. Investimi me fondet e Bashkisë Shkodër parashikon ndërhyrje të plotë, punime për kullimin, shtresat dhe sinjalistikën vertikale e horizontale.  Punimet e nisura janë inspektuar sot nga kryetarja e Bashkisë Shkodër, znj. Voltana Ademi, që është takuar me banorë të zonës, të cilët e kanë falenderuar për këtë investim.

“Ne kemi filluar punimet, në një rruge që i shërben shumë familjeve. Ky investim është një prioritet i vendosur në komunën Dajcc, tha kryetarja Ademi. Me ritmet që do punohet, mendohet që rruga e re të mbarojë brenda dy javësh. Këtij fshati, kësaj zone do t’i ndryshohet faqja, që Dajçi të bëhet një atraksion për të gjithe ata që duan të shikojnë bukuritë e tij dhe mbarë zonës”.

Banorët kanë falenderuar kryetaren e Bashkisë, znj. Voltana Ademi për këtë punë të mirë që po bën për ta, një investim i munguar prej kohësh e që do t’i japë zhvillim zonës.

Investimi për segmentin e parë të rrugës së Mushanit arrin në 9.6 milion lekë dhe do të ndikojë në përmirësimin e kushteve të jetesës për rreth 2 mijë banorë të kësaj zone./55news.al/