Rastësi ose jo, por vetëm pak orë para se Prokuroria e Durrësit të grabitej për së dyti, në zyrën e shefes së këtij institucioni, Anita Jella, ka qëndruar gjatë drejtuesja e caktuar e Prokurorisë për Krime të Rënda, Donika Prela.
Kjo e fundit drejtoi Prokurorinë e Durrësit për rreth 4 muaj, derisa para pak javësh u katapultua në drejtimin e Prokurorisë për Krime të Rënda. Donika Prela zëvendësoi Besim Hajdarmataj, pikërisht, një ditë pasi iu vodh Posta Sekrete në Durrës, ku gjendeshin, ndër të tjera, edhe materiale që do t’i dorëzoheshin prokurorit Afrim Shehu, zyra e të cilit u grabit mesnatën duke u gdhirë dita e Enjte.
Tashmë, për së dyti, Donika Prela gjendet në Durrës vetëm pak kohë para se grabitësit vodhën sërish materialet e prokurorit Afrim Shehu. Burime nga Prokuroria e Durrësit deklarojnë në kushte anonimati për “Boldnews.al” se Donika Prela ka qëndruar rreth 4 orë, gjatë ditës së mërkurë, në zyrën e drejtueses së Prokurorisë së Durrësit, Anita Jella. Nuk ka detaje se për çfarë arsye ka qenë ky takim kaq i gjatë, aq më tepër kur Prela ka ngarkesë specifike në Prokurorinë për Krime të Rënda.
Gjithësesi, vetëm disa orë pas largimit të Prelës nga zyra e Anita Jellës, grabitësit kanë hyrë dhe kanë vjedhur dosjet e prokurorit Afrim Shehu, gjithashtu kanë thyer dhe shkatërruar edhe serverin e kamerave të sigurisë së institucionit. Ndërkohë, burime policore deklaruan se “nuk ka thyerje të derës kryesore të godinës së Prokurorisë”, gjë e cila shton dyshimet se gjithçka mund të jetë organizuar nga njerëz brenda institucionit.
Ndërkohë, grabitja e fundit në Prokurorinë e Durrësit do të vijojë të lidhet me emrin e Donika Prela. Në një reagim zyrtar, Prokuroria e qytetit bregdetar deklaroi se, për rastin e vjedhjes së zyrës së prokurorit Afrim Shehu, ka nisur hetimet për vepra penale në kuadër të grupit të strukturuar kriminal. Pra, prokuroria Durrës vlerëson se ky akt grabitjeje është kryer nga persona që janë pjesë e ndonjë grupi të mundshëm kriminal.
Duke i dhënë një cilësim të tillë, hetimi i mëtejshëm do të vijojë nga Prokuroria për Krime të Rënda, e drejtuar nga Donika Prela, e cila vetëm disa orë para vjedhjes, ka qenë “bujtëse” në zyrën e shefes së prokurorisë së Durrësit, Anita Jella.
Sa për kronikë, vjedhja e postës sekrete së Prokurorisë së Durrësit, pak javë më parë, ende nuk është zbardhur. Në postën sekrete, ndër të tjera, kishte edhe dokumenta që i ishin dërguar prokurorit Afrim Shehu për dosjen hetimore të tjetërsimit të tokave në bregdetin e Ishmit. Edhe së fundmi, në zyrën e tij, janë vjedhur sërish dokumenta që lidhen me këtë dosje.
