5 persona janë vënë nën hetim pas dyshimeve se kanë përdorur investimet në monedhën virtuale, Bitcoin për të pastruar rreth 1 milionë euro. 

Ndaj këtyre personave me Banim në Durrës, Tiranë e Kavajë,  ka nisur procedim penal Sektori i Antikrimit ekonomik ashti si edhe Prokuroria e kryeqytetit.

Është bërë gjithashtu i mundur edhe sekuestrimi i disa pajisjeve që shërbejnë për të kryer transaksione në Bitcoin.

Dyshohet se paratë janë futur në territorin shqiptar nga disa persona me kombësi izraelite.  Bashkë me pajisjet janë sekuestruar edhe një sasi parash kesh prej 250 mijë euro të padeklaruara në kufi.

Nga rezultatet e deritanishme të hetimeve dyshohet se pesë personat janë përpjekur që përmes kompanive fiktive të pastrojnë rreth 1 milionë euro të sjella nga jashtë kufijve.  

Pajisjet e specializuara për kryerjen e transaksioneve me Bitcoin janë zhdoganuar më 16 dhe 18 prill. Aktualisht ato janë vënë nën sekuestro, pasi dokumentet shoqëruese të tyre kanë rezultuar false.