Teatri “Teuta” nga qyteti i Ulqinit vjen sonte për artdashësit kryeqytetas në Skenën e Re “arTurbina” me shfaqjen “Nana”, në kuadër të Festivalit Mbarëkombëtar të Teatrit. “Nana” vjen nga autorja Arlinda Morina, me regji të Munid Abazit dhe nën interpretimin e aktorëve si Blerta Kurti, Anes Kurti, Muho Uruçi, Bashkim Alaj etj.
Shfaqja trajton për publikun historinë e një familjeje që jeton në kushte jo të mira ekonomike, por pavarësisht varfërisë, nënë e bir kanë një jetë të lumtur. Situata në familje ndryshon, kur në mesin e tyre ndërhyn një personazh i tretë, gruaja e djalit, e cila prish ekuilibrin e krijuar deri në atë moment. Djali gjendet përpara zgjedhjes dramatike mes nënës dhe gruas.
Shfaqja “Nana” vjen sonte për publikun në orë 21:00 në skenën e re ”arTurbina”.
