Festivali Mbarëkombëtar i Teatrove u mbyll me triumfin e “babait”. Kupa e festivalit, si “Aktori më i mirë” iu dha aktorit Reshat Arbana. “Nderi i Kombit”, “Artisti i Popullit”, aktori i shquar i skenës dhe ekranit është një prej personaliteteve më të mëdha të artit sot, artisti i madh i regjisorëve të mëdhenj, aktori i sa e sa personazheve, gjithnjë i pranuar dhe i pëlqyer nga shikuesi dhe kritika. Gjithnjë i adhuruar nga populli dhe i dashur për popullin. U lind në Tiranë në 15 shtator 1940 në familjen e një zanatçiu, i ardhur nga fshati Arbanë i Tiranës, shumë kohë më parë. Babai i Reshatit, Hamiti, së bashku me të vëllanë, Shaqirin, banonin pranë rrugës së Kavajës, ngjitur me ish-godinën e Radio Tiranës. Ata ishin zanatçinj të atë dhe me emër në kryeqytet. Mbasi mbaron arsimin e detyrueshëm, 7-vjeçar, ku ra në sy për talentin dhe prirjet e tij për teatrin, me aktivizimet e herëpasherëshme në grupin artistik të shkollës, gjatë skeçeve, interpretimit të poezive apo imitimeve, ndoqi shkollën e mesme teknike, politeknikumin “7 Nëntori”, gjatë viteve 1954-1958. Edhe këtu, sikurse edhe gjatë viteve në shkollën 7-vjeare, ai u aktivizua në grupet artistike dhe thelloi më tej dëshirën, pasionin dhe aftësitë e tij artistike. Atë vit, sapo mbaroi politeknikumin, fillon punë në Parkun e Kamionëve, një vend shumë larg ëndrës së tij. Por që për tre vjet pune si tornitor, ai nuk hoqi dorë nga ëndrra e hershme. Në 1961 konkuron dhe komisioni përzgjedhës i artistëve të ardhshëm nuk gaboi. Pas konkurrimit fiton të drejtën për të vazhduar studimet e larta në ILA, dega dramatike. Ishte viti 1961. "Arkeologu" dhe "Kovaçanë" janë dy etydet e para në ILA, që u pasuan me të tjera etyde dhe role në skenën e Institutit të Lartë të Arteve. Në vitin 1965 diplomohet për aktor, por u emërua redaktor në Radio Tirana për emisionet e fëmijëve dhe të rinisë, si regjisor dhe më pas shef redaksie. Për shtatë vjet rresht ai realizon shumë emisione, kulturore-artistike për fëmijë e të rinj. Gjithashtu Reshat Arbana është autor i disa pjesëve me një akt, dramatizime etj. Paralelisht me punën Reshat Arbana u angazhua në filmin artistik. Ishin dy regjisorët e shquar Viktor Gjoka e Dhimitër Anagnosti që i besuan rolin e parë, Nikolla, në filmin "Komisari i dritës", në vitin 1966, dhe pak më vonë, ky i fundit, e mori përsërinë filmin e tij të parë "Dueli i heshtur", ku roli i Islamit e bën atë të njohur në të gjithë vendin. Deri në vitin 1974, kur Reshat Arbana kapërceu dyert e Teatrit Popullor, ëndra e tij e vjetër.
Pervoja e grumbulluar prej vitesh, dëshira dhe pasioni i madh së bashku me talentin e padiskutueshëm të Rashat Arbanës shpërthyen në një sërë rolesh të sukseshme në Teatrin Kombëtar.
“Nga ato "role të zemrës" janë p.sh në dramën "Familja e peshkatarit", të Sulejman Pitarkës, ku kam patur rolin e Selim Brukës.Një nga rolet që e kam dashur shumë. Unë në përgjithesi jam aktor i heroikes, i tragjikes. Nuk jam i planit estradesk. Mbase edhe karakteristikat e jashtme i kanë shtyrë regjisorët të më japin role qëndrore, me peshë dramatike dhe heronj.”
Pas vitit 1991, për mëse një dekadë, pati një periudhë heshtjeje, por që u thye në vitet 2000, me dy role në Teatrin Kombëtar: aktorin te “Streha e të harruarve” dhe Xhef Kalni te “Fishkëllimë në errësirë” i Spiro Dunit.
“Puna ime, dashuria për profesionin, ndihma e shokëve dhe eksperienca e Teatrit Kombtar bëri që unë të evidentohem si edhe shumë kolegë të tjerë e të bëhem një personazh që gëzon respekt gjithandej.Ky është një respekt që nuk e gjen në të gjitha profesionet. Sepse,një politikan edhe nëse kujtohet, kujtohet për keq. Kurse, aktori e ka fatin e madh se bëhet i pavdekshëm. Njerëzit gjithnjë do të kujtojnë kush ka qënë Kadri Roshi, Sulejman Pitarka, SanderProsi …, sepse ata e kanë ushqyer popullin shpirtërisht.”
Por artisti i madh Reshat Arbana që është nderuar disa herë me çmime në festivalet e filmit dhe ato të teatrit, si dhe është vlerësuar me titullin e lartë "Artist i Popullit" dhe në vitin 2011, Presidenti i Republikës, z. Bamir Topi, e vlerësoi atë me titullin e lartë “Nder i kombit”, titulli i parë që i është dhënë një aktori të madh. Vlerësimi i fundit erdhi në Festivalin Mbarëkombëtar të Teatrit, ku u vlerësua me kupën si “Aktori më i mirë” për rolin e babait në dramën që mban po atë titull, me regji nga Spiro Duni. I emocionuar Arbana u shpreh pas marrjes së çmimit: “Hera e parë që marr një çmim në karrierën time dhe u jam mirënjohës dashamirësve dhe jurisë që më dha këtë çmim...”
Lidhur me zhvillimet e fundit mbi artin e kulturën, si dhe TK, ai është shprehur gjatë një takimi me kreun e Bashkisë Velija se “unë vij për hërë të parë në këto takime. Nuk na lejohet ne aktorëve që të zihemi dhe t’i vëme epitete njeri-tjetrit. Teatri duhet të mbetet aty. Unë nuk e di se sa mund te shkojë aty si vlerë. T’i lemë këtë njerez të ushqejne me emocione popullin... Kullat do të duken sikur do të na bien mbi kokë!”.
Urojmë që ky rol e ky çmim të mos jetë i fundit për të pasi është një aktor i madh, një nga më të mëdhenjtë e TK dhe që ka forca, ka energji dhe klasin e sharmin për të na dhuruar të tjera role e kryerole si në skenë ashtu edhe në film.F.S/55news.al
