Filmi “Internimi” i regjisorit Kast Hasa merr pjesë në “Arizona International Film Festival”. Me këtë pjesëmarrje filmi shqiptar shënon dhe premierën botërore. Me skenar dhe regji nga Kast Hasa filmi tregon ngjarje të vitit 1983, nga Shqipëria gjatë sundimit komunist. Festivali nis nesër dhe zhvillohet deri më datë 21 të këtij muaji, ku “Internimi” konkurron për çmimin filmi më i mirë. Filmi që pritet të jetë premierë botërore për publikun sjell një histori dashurie të ndaluar gjatë periudhës së komunizmit. Dashuri, urrejtje dhe vrasje por e gjitha një histori shqiptare, në filmin e financuar nga Qendra Kombëtare Kinematografisë. Rolet në film luhen nga aktorët Klodian Hoxha, Enxhi Cuku, Kristi Baçi, Kristaq Pilo, Jorida Meta, Gramoz Gashi, Arjeton Osmani, Ioana Sinani, etj. Regjisori Kast Hasa për filmin e tij mes të tjerave është shprehur se filmi “Internimi” është një përpjekje për të hedhur dritë mbi mizoritë e asaj kohe në vendin tonë. “Duke u rritur në Shqipërinë komuniste, nuk isha krejtësisht në dijeni të frikës dhe shtypjes që qeveria po shkaktoi në jetën e popullit të saj, jo vetëm për shkak të propagandës komuniste, por kryesisht për shkak se prindërit e mi kurrë nuk folën për të, duke pasur frikë se do të merrja fjalën jashtë. Vetëm 10 km nga qyteti im ishin këto fshatra, njerëzit e të cilëve qeveria kishte detyruar internimin vetëm për shkak të diçkaje që kishin thënë. Internimi është një përpjekje për të hedhur dritë në mizoritë dhe absurditetet e kësaj kohe të veçantë”, shprehet regjisori Hasa. Me regjisor Kast Hasa dhe producent Saimer Zeneli dhe Gjergj Trola, xhirimet e filmit janë zhvilluar në Divjakë. Për sa i përket fotografisë është kujdesur Andrew Parke nga Amerika.