Filmi “Shpia e Agës” me skenar dhe regji nga Lendita Zeqirajt u shfaq premierë në Karlovy Vary. “Shpia e Agës” hapi konkurrencën e “East of the West” në festivalin ndërkombëtar të Karlovi Varit (Karlovy Vary) të Çekisë. Qendra Kinematografike e Kosovës shkruan se filmi u prit jashtëzakonisht mirë nga publiku në një premierë të rëndësishme dhe domethënëse. Filmi tregon për Agën (Arti Lokaj) 9 vjeçar i rritur me nënën e tij në një shtëpi jashtë qytetit. Ai mëson serbisht nga Zdenka, një grua e nacionalitetit tjetër, në mënyrë që të gjejë babain e tij për të cilin mendon se është në burg në Serbi. Hapja e konkurrencës “East of the West” në Karlovi Vari (Karlovy Vary) me filmin e Lenditës është momenti më i rëndësishëm i radhës për filmin. “Shpia e Agës” ka për producent Bujar Kabashin. Rolet i luajnë aktorët nga Kosova dhe Shqipëria. Në role përmendim aktorët Arti Lokaj, Rozafa Çelaj, Adriana Matoshi, Shengyl Ismaili, Melihate Qena, Basri Lushtaku, Rebeka Qena, Molikë Maxhuni, Egla Ceno etj. Me rastin e bërjes publike të lajmit për hapjen e Karlovi Varit me filmin “Shpia e Agës”, më herët skenaristja dhe regjisorja e filmit Lendita Zeqiraj u shpreh se ishte e nderuar, që filmi i saj do të hap këtë program të konkurrencës ndërkombëtare të festivalit në Çeki. Në reagimin e saj mes të tjerave regjisorja po ashtu është shprehur se filmi do të shihet nga shumë njerëz dhe do të flasë me botën, sepse tashëm udhëtimi i tij ka filluar. “Realizimi i këtij filmi nuk ka qenë fare i lehtë, na është dashtë shumë kohë, përpjekje e sakrifica. Ishte shumë sfiduese por njëherësh edhe përvojë e mrekullueshme. Jam shumë e lumtur, që udhëtimi i tij po fillon. Filmi do të shihet nga shumë njerëz dhe do të flasë me botën. Për mua kjo është ajo që më bën të ndjehem tani e shpërblyer”, pohon regjisorja. Filmi “Shpia e Agës” është bashkëprodhim në mes Kosovës, Kroacisë, Francës dhe Shqipërisë me shtëpitë prodhuese N’ART FILMS mbështetur nga Qendra Kinematografike e Kosovës, bashkëprodhuesit WOOF FILMS nga Kroacia; Sacrebleu productions nga Franca; si dhe Ska-Ndal Productions dhe SY13 Films nga Shqipëria mbështetur Qendra Kombëtare e Kinematografisë. Në aktivitetin e saj me kinemanë regjisorja Lendita Zeqiraj është një emër i njohur me punën e saj me filmat.