El Classico” i sotëm, ndoshta nuk ka vlerën e viteve të kaluara kur diskutohej titulli, por me siguri mbetet ndeshja më e rëndësishme e kampionatit spanjoll.

Kur një ekip shpallet fitues, rivalët në takimin e radhës e presin mes duartrokitjesh. Diçka të tillë “galaktikët” nuk kanë ndër mend ta bëjnë. Shenjat e para të vullnetit merengues i dha kapiteni Serxho Ramos disa ditë më parë, ndërsa në konferencën e djeshme ishte Zidan që deklaroi:

“Unë nuk jam askush për të vendosur diçka të tillë, por me sa mbaj mend në “El Classico”-n e fazës së parë ne sapo kishim fituar botërorin për klube dhe ata (Barça) nuk na nderuan, duke thënë se nuk bëhej fjalë për një turne ku kishin marrë edhe ata pjesë. Kjo është një gënjeshtër sepse për të qenë kampion bote duhet më parë të fitosh Ligën e Kampioneve”. Nuk do të ketë pritje të veçanta as për Andres Iniestën, për të cilin Zizu tha: “Do ta përshëndesim, do ta përgëzojmë dhe do t’i urojmë më të mirën për të ardhmen”. tha Zidane.