Tashmë gjithçka është gati për pritjen e këngëtarit shqiptar që jeton në Itali. Mbrëmjen e nesërme me 1 qershor Ermal Meta do të jetë në Tiranë, ku do të mbajë një koncert në sheshin “Skëndërbej”.

Pas pjesëmarrjes në Eurosong dhe pas votës së të gjithë shqiptarëve, Ermali vjen për të përshëndetur vendlindjen në një koncert të jashtëzakonshëm në Tiranë.
Nga profili i tij në Instagram, Meta ka postuar një foto e cila tregon se tashmë këngëtari është nisur: “Tirana, po vij” – shkruan Ermali.

Jo vetëm me tekstin dhe muzikën e tij, por edhe me përfaqësimin në kauza sociale, Ermali i ka fituar zemrat e publikut shqiptar dhe atij italian. Nesër e gjithë Tirana do të jetë në shesh për ta përshëndetur dhe për ta duartrokitur muzikën e tij dhe mesazhet që nuk mungojnë në vargjet e kantautorit.

Ermalit, nesër do t’i bashkohen edhe shumë këngëtarë të tjerë shqiptarë, që do të prezantojnë këngët e tyre të fundit para publikut kryeqytetas.