Nga Kastriot Dervishi

Siç edhe shumë akte të tjera të rëndësishme të shtetit shqiptar, edhe procesverbali i Kongresit të Lushnjës nuk ka mbërritur në ditët tona. Atë që ka ndodhur në kongres, përveç të dhënave të shtypit të kohës, ne e kemi mësuar kryesisht nga tre burime të dyta, të cilat janë kontradiktore ndërmjet tyre në lidhje me pjesëmarrësit:

1-Kopjes së shkruar (pra jo fotokopjes) që gjendet në AQSH, në fondin personal nr.55 të Sotir Pecit. Ky procesverbal i është referuar vendimeve të Lushnjës, por nënshkrimi është bërë në Tiranë më 12.2.1920. Ky dokument nuk duhet marrë si absolut, pasi kanë nënshkruar ata që kanë qenë në Tiranë atë ditë. Vërtetimi nga origjinali që duhet të ketë qenë në duart e Sotir Pecit, është bërë prej tij më 26.2.1920. Në procesverbalin që gjendet te fondi i Sotir Pecit, vihen re: mungesa e delegatëve të Matit (ka qenë Ahmet Zogu), Shijakut (Hamit Toptani, Rexhep Jella), probleme në shkrimin e emrit të Dine Nasufit. Po ashtu ka mospërputhje me librin e qarkoreve në lidhje me nënshkruesit e mëvonshëm të Shkodrës e malësisë, Lezhës, Mirditës, Pukës, Gashit. Te Sotir Peci janë edhe emrat e delegatëve: Ali Begeja, Visho Begeja, Dan Hasani dhe Gjok Dodë Lleshi (i Spaçit), të cilët mungojnë te qarkoret.

2-Librit të qarkoreve të Ministrisë së Punëve të Brendshme (faqe 8-9). Këtu vihen re disa gabime në emra apo mbiemra të pjesëmarrësve, por edhe mungesa. Nuk shënohet delegati tjetër i Mallakastrës Kamber Belishova (që gjendet te Sotir Peci).

3-Librit “Shqipënija më 1937”, botim i komisionit të 25-vjetorit të vetëqeverimit nën drejtimin e Dhimitër Beratit, (faqe 44-45). Këtu janë saktësuar emrat që kanë qenë shkurtesa, por janë bërë dy gabime të tjera. Emri i Shaban Blloshmit është zëvendësuar me Selaudin Blloshmin, si dhe është bërë interpretimi se 3 delegatët e Vlorës nuk kanë marrë pjesë në punime sepse ishte e pushtuar. Edhe këtu, si edhe te libri i qarkoreve, mungojnë emrat e delegatëve: Ali Begeja, Visho Begeja, Dan Hasani dhe Gjok Dodë Lleshi (i Spaçit).