Nga Kastriot Dervishi
Angelo Virgino Bertoni, lindur në vitin 1921 në Mantova të Italisë, me kombësi italiane e shtetësi shqiptare kishte ardhur në Shqipëri në vitin 1939 si ushtar “në radhët e ushtrisë fashiste italiane”. Pas kapitullimit të Italisë, në pamundësi kthimi, qëndron në fshatin Jorgucat, duke u martuar e krijuar familje. Kishte 3 fëmijë. U arrestua më 3.8.1968. U akuzua në bazë të nenit 73/1 të Kodit Penal.
Thuhej se ishte shprehur me urrejtje për diktaturën e proletariatit, si p.sh. gjatë një feste në Vrisera. Më 3.8.1969 në klubin e fshatit Vrisera kish pirë disa gota raki i drejtohet një fshatari që po lexonte “Zërin e Popullit” dhe “bërtet në mënyrë armiqësore kundër shtypit popullor”. Ndërsa “në biseda të fshehta” kishte folur sistemit të ekonomisë kooperativiste se fshatarësia vuante për bukën e gojës, etj. “Ky agjitacion i fëlliqur bëhet me qëllim që të dobësojë vrullin e fshatarësisë kooperativiste në pjesëmarrjen në punë dhe shtimin e rendimenteve bujqësore, etj”-thuhej në vendimin e gjykatës. I pandehuri sipas saj kishte përdorur në apologjinë e mbrojtjes “taktika të ndryshme”, “dredhira e zigzake”, të cilat nuk e tundën gjykatën në verdiktin e saj.
Në vendimin e gjykatës midis të tjerash thuhej:“Duke qëndruar konsekuent në rrugën e tij të armiqësisë, në mënyrë të hapur e të fshehtë ka agjituar dhe propaganduar kundër pushtetit tonë popullor, kundër sistemit tonë shoqëror në favor të armiqve të jashtëm të Republikës Popullore të Shqipërisë, monarko-fashistëve grekë dhe neofashizmit. I pandehuri me anën e bisedave të tij të fshehta armiqësore, duke u bërë zëdhënës i propagandës shoviniste greke, ka agjituar për përmbysjen e pushtetit dhe okupimin e Shqipërisë së jugut nga monarko-fashistët grekë me ndihmën e imperialistëve dhe revizionistëve modernë. Ai për të bërë elementë të pakënaqur në radhët e minoritetit dhe të përhapur psikozën e luftës, në bisedat e tij armiqësore është shprehur se minoriteti grek duhet të ngrihet kundër pushtetit popullor në mënyrë që grekët të gjejnë pretekstin për të sulmuar vendin tonë. Këtë agjitacion të fëlliqur i pandehuri e ka bërë pikërisht në kohën kur populli ynë i është përveshur me gjithë forcat revolucionarizimit të gjithë jetës së vendit dhe sidomos të gatishmërisë luftarake për mbrojtjen e fitoreve të revolucionit popullor”.
Gjykata Popullore Gjirokastër, e drejtuar nga Sotir Qirjaqi, me pjesëmarrjen e ndihmësprokurorit Ziver Çami, me vendimin nr.1, datë 31.1.1969 e deklaroi fajtor dhe e dënoi me 5 vjet heqje lirie. U lirua nga Reparti nr.303 Spaç më 3.7.1973.
