Nga Kastriot Dervishi

Puna e rëndë në minierën e Repartit nr.311 Qafë Bari të Rrethit Pukë, shoqërohej shpesh herë me aksidente në punë. Përveç vdekjeve që mund të vinin për arsye të sëmundjeve, asnjë i dënuar nuk e kishte të sigurt jetën gjatë punës në atë vend që vetë të burgosurit e quanin “kamp shfarosje”. Më poshtë disa raste të njoftimit të vdekjeve nga komunikata ditore operative.

Njoftimet:

Komunikatë operative nr.239, datë 8.11.1983

Më 7.10.1983, ora 1.30, i dënuari Fejzulla Beqir Keti, vjeç 42, nga Librazhdi, i cili vuan dënimin në repartin nr.311 Qafë Bari, u gjet i vdekur në një galeri. Grupi operativ konkludoi se ka rënë në një galeri vertikale në një front të ndaluar, nga ku mendohet se ka kërkuar për të dalë,

Komunikatë operative nr.157, datë 4.7.1984

Më datën 3.7.1984, gjatë punës, është shembur një bllok minerali në minierën e Qafë Barit dhe për rrjedhojë, kanë gjetur vdekjen dy të dënuar. Në vend shkoi grupi operativ dhe konstatoi se të dënuarit janë Dilaver Hysi, vjeç 37 e Ilmi Çoçka, vjeç 45.

Komunikatë operative nr.164, datë 11.7.1984

Më 10.7.1985, ora 11.00, në Repartin e riedukimit 311 në galerinë 796 ku punojnë të dënuarit Arif Hysni Braho, vjeç 28, lindur në Zvezdë të Korçës, i dënuar 2 herë, herën e fundit më 1981, është dënuar me 4 vjet heqje lirie për tentativë arratisje, duke punuar te Trimozhi i transportit të mineralit. I lartpërmenduri u fut për ta zhbllokuar, e zë minerali nën vete duke i shkaktuar vdekjen. Shkoi grupi operativ dhe nxori si përfundim se shkaku i vdekjes është nga pakujdesia e tij.