Nga Kastriot Dervishi
Në historinë e tyre, disa e kanë quajtur qeveri “demokratiko-borgjeze”. Por krahas gjërave që këqija që qeveria e Noli bëri, nuk është përmendur asnjëherë goditja ndaj kulturës, e pikërisht shkrirja e Drejtorisë së Muzeut dhe Bibliotekës Kombëtare me një akt të pazakontë e të padëgjuar. Pikërisht më 29.8.1924 doli dekretligji për suprimimin në Ministrinë e Arsimit, të Drejtorisë së Muzeut dhe Bibliotekës Kombëtar. Në mungesë të regjentëve (vetëm Sotir Peci ndodhej në atdhe), dekretin e kanë nënshkruar zëvendësisht kryeministri Sulejman Delvina, zëvendësisht ministri i Arsimit, Stavro Vinjau dhe zëvendësisht ministri i Financave Xhemal Bushati (Fletorja Zyrtare”, nr.32, datë 30.8.1924, faqe 2). Për këta, muzeu dhe biblioteka nuk duhej të ishin gjë tjetër veçse pjesë e administratës brenda ministrisë dhe jo organ varësie i saj. Akti nuk pati kohë të linte gjurmë sepse në dhjetor 1924, qeveria e Nolit e la pushtetin.
Pavarësisht se askush nuk kishte cilësinë e regjentit, madje shkonte delegim pas delegimit, akti që ishte tërësisht i qeverisë, sillte suprimimin e:
-Drejtorisë së Muzeut dhe Bibliotekës Kombëtare
-Inspektoria e përgjithshme
-Zyrat e inspektorëve
-Nëpunësi e magazinieri
-Kopshtari i ministrisë dhe muzeut
-Organizatori i muzeut (nga 1 janari 1925)
Në organizimin e ri, muzeu dhe biblioteka konceptoheshin si zyra administrate në seksionet A dhe B të ministrisë, e jo si organe varësie.
