Nga Kastriot Dervishi
Pasi ishin prishur me financuesit e kombinatit metalurgjik, pra me kinezët, në vijim të veprimeve megalomane, me vendimin e datës 9.10.1978, Kombinati Metalurgjik i Elbasanit u quajt “Çeliku i Partisë”. Në vendim cilësohej se ishte “një nga veprat monumentale të partisë dhe klasës punëtore që forcën ekonominë dhe pavarësinë e vendit”.
Në fakt, si e gjithë ekonomia socialiste, kombinati në fjalë ishte kampioni i rrugës së gabuar, humbjeve të pallogaritshme, dëmeve ekologjike, dëmit të shëndetit të njerëzve, etj. Ky kombinat që u ndërtua pjesërisht me kreditë kineze, ishte investim i gabuar në vëllimin e ndërtimeve të tij, duke u ndërtuar mbi tokë bujqësore (prodhimi bujqësor i humbur është një tjetër dëm i madh ekonomik). Nuk doli asnjëherë me fitim. Ai i rëndonte buxhetit të shtetit sepse importonte çdo vit 40 milionë dollarë dhe eksportonte vetëm 5 milion të tilla. Ai ishte një mundim për popullsinë e qytetit të Elbasanit, zonave përreth, por edhe shumë të tjerëve që erdhën nga gjithë vendi, për një drejtim të gabuar profesional e jetësor. Ai shkaktoi sëmundje të shumta për popullsinë e atyshme, si dhe për nëntokën e cila nuk dihet se sa shekuj do përçojë këtë problem të madh ekologjik.
