Nga Kastriot Dervishi

Më 21.6.1946, teksa gjykohej Koalicioni Demokratik, së sallën e gjyqit, prokurori Nevzat Haznedari deklaroi se të internuarit në Berat duhej të ngordhnin e jo të ndihmoheshin. Ndonëse kjo nuk ishte në rendin e procesit, por një deklarim rastësor, gjuha e prokurorit ishte një demonstrim i luftës së klasave. Kampi i Beratit ishte çelur në mars 1945 dhe qëndroi atje deri në maj 1949 kur u zhvendos në Tepelenë. Në të ishin gra, fëmijë dhe pleq, familjarë të personave të arratisur brenda apo jashtë vendit. Ata mbaheshin si një lloj pengu kundër të arratisurve.

Pjesë nga procesi:

Prokurori (Nevzat Haznedari): Gjergji na foli për një opozitë legale konstruktive, po kjo na del destruktive tani.

Qenan Deibra: U bisedua çështja e Kosovës. Gjergj Kokoshi tha që programi nuk duhej të ndryshonte nga ai i Frontit. Ne i thamë që ta ndryshonim dhe se ishte e pamundur të paraqinim një notë qeverisë drejtpërsëdrejti për shtyrjen e zgjedhjeve.

Prokurori: A do të shënohej në notë se opozitën do ta formonin kriminelët e luftës?

Gjergj Kokoshi: Samiu (Çeribashi) më tha se familjet e të arratisurve të internuar në Berat vuajnë. Unë s’kam thënë kurrë të ndihmohen të arratisurit, por të ndihmohen familjet e tyre.

Prokurori: Gjergj Kokoshi duhej t’u thoshte të ngordhin e jo të ndihmohen.

Gjergj Kokoshi: S’mund të them të ngordhnin.