20 shkurti 1991 ka pasur shumë arrestime. Në Gjykatën e Tiranës u dërguan shumë kallëzime penale nga Drejtoria e Punëve të Brendshme të Tiranës, me një shkresë përcjellëse identike, duke u bërë pjesë e dosjeve të kësaj gjykate. Përmbajtja e saj është shumë interesante mbi artikulimin që përmban.
***
Lënda: Mbi rrëzimin e monumentit të Enver Hoxhës në sheshin “Skënderbej”
Në mbështetje të kërkesave politike të një pjese të studentëve të UT, më datën 19.2.1991, Sindikatat e Pavarura, u bënë thirrje punëtorëve të kryeqytetit e të mbarë vendit që të lënë punën e solidarizohen me studentët që kishin shpallur grevën e urisë. Në mëngjesin e datës 20.2.1991, mijëra punëtorë të Tiranë, lanë punën dhe ngjitën në qytetin “Studenti” ku u organizua një miting i paligjshëm. Aty folës të ndryshëm u shprehën në mbështetje të kërkesave politike, fyen figurën e Enver Hoxhës. Në vende të ndryshme ishte vendosur parulla “Enver-Hitler”, “Enver kancer”, “Poshtë Enver Hoxha”, etj, të cilat shoqëroheshin me britma prej grupeve të mëdha njerëzish.
Mbas kësaj, turma prej disa mijëra njerëzish vërshuan me dhunë nëpër qytetin e Tiranës, duke goditur me gurë e mjete të tjera forcat e rendit. Me gjithë kundërshtimin e forcave të rendit turmat të organizuara mbërritën në sheshin “Skënderbej” ku rrëzuan monumentin. Pas rrëzimit atë e tërhoqën zvarrë me kavo të rimorkuar me makinë duke e çuar në sheshin “Demokracia” dhe që këndej përsëri në rrugët e qytetit ku në mbrëmje u bë e mundur të demoralizoheshin dhe t’u merrej monumenti.
Në rrëzimin e monumentit ka marrë pjesë edhe ...., për të cilin ju dërgojmë materialet e nevojshme ligjore në bazë të dekretit të Presidiumit të Kuvendit Popullor nr.5459, datë 22.1.1991.
